| تبليغات | X |
بویون قیشدی
بویون دوننه گؤره
یئنی لشمه دی
بویون آتامی قویلاماغا
حاققیم یوخدو
آنامی دا باغریما باسماغا
قولوم.
بویون بیر داها
سئویره م دئمه یه
دوداقلاریمی اکیزلریمدن سیله جکلر
بویون سؤزلریمی
سویا چکه جکلر
اوز زامان
او زامان چؤره ک آلاردیق
و قوللاریمیزین اوستونده ائوه گتیره ردیک.
اوندا یوغورت آلاندا
ائوه چاتینجا بارماغیمیزلا چوخونو یئیردیک.
ایندییه باخما قانوولار میکروب لودور
یوغورتا بارماق باسماییرلار
و چؤره ک لر سلفون لا ساتیلیر.
اوندا ائولریمیزین حیطی واریدی
ـ ایندیکی تکین ماهواره ذاتدا یوخودو ـ
بیلگی سایارلاردا عؤمروموزو چئینه مزدیلر.
او زامان مدرسه یه اؤزوموز گئده ردیک
سویوق ده ینده ده بیر آسپیرین آتاردیق.
ایندی کونسئرو اولموشوق آپارتومانلاریمیزدا
دونیا کیچیلیب جاملاریمیزدا .
قادینلاریمیزین کبینینه سیغیشیب غئیرتیمیز
قونشونون دا ناموسونو آنلایانمیریق.
هاممیمیز ایش سیزیک
و کوچه لر دولوب پولسوزلوغوموزلا.
شهرلریمیزده قولاقلاریمیز شهره کیمی باشیمیزدان آسلانیر
و گؤزلریمیز ایله نیب.
باشیمیزا هر نه اویون گلیر ستارخانین قارغیشلارینداندیر.
کئشگه اؤزوموز اؤلدوره یدیک او کیشی نی
و آستانامیزدا قویلایایدیق
ـ تبریزین قارغیشلاری بئواخت دوتور
یا دا دوتمور هئچ ـ
ائوه چاتیریق ایشده ن
اوغلوموز قاباغیمیزا قاچیر سانجیریق
اودا بئکار قالاجاق.
قیزیدا بؤیودوروک اؤزگه نین ائوینه یوللایاق.
ائو...
او زامان شهر بوتون آغاجلیق ایدی
و بویوموز اوجا
او زامان پنجره لریمیزین بیر بئله پرده سی یوخودو
و آیاغیمیزین آلتیندا فرش لرده ن
قیزیل ماهنی لار گؤیه ره ردی. ( گول آچاردی)
اوندا بیر بئله اداره یوخودو
بیر بئله زندان...
تورکجه شعر
پنجره نی آچاندا
اسکی کوچه تپیلیر اوتاغیما
آددیملارینین سسی
دولدورور قولاقلاریمی
و بیر گؤزله ییش یاخیر جانیمی
الیم آیفونون دسته یینده
... ایندی زنگ چالینار...
بیر گؤیرچین یازیلیر هره یه
و من دیمدییندن آخان
گلیش موشتولوغونون شوخلوغونا گولوب
کوچه یه تؤکورم گؤزلریمی
و کوچه ائله جه پنجره مین قابیندا
باخیشلاریما بره لدیب
سن سیزلییینی
آیدین یارین
کیتابلاری یاندیردیلار
قولتوغومدان
اوره ییمین لاله سینه یارپاقلاشان
کیتابلاری
داشیدیلار.
جیبلریمدن محبتله
امنیتی بوشالدیبان
شیرینی بالیق دولدوردولار.
دوداغیمدان
سئوینج گولون یولوشدوروب
پالچیق فیشقا یاراشدیریب
ـ هئیکل سایاق ـ
سویوق ـ سویوق مئیدانلارا سورودولر.
قولتوغومدا کیتاب سیزلیق آغیرلاشدی.
جیبلریمله دوداقلاریم
یونگول لشدی.
آخشام چاغی قارانلیغی بزه مک چون
کؤکسوم اوسته
یارپاقلاری یاندیردیلار.
گونشی مات ائتدی گؤی شطرنجینده
یاریشیندا بیزی آللاتدی تاریخ
سارماشدی یادداشین درینلییینه
اویان خیاللاری اویاتدی تاریخ
دار کیمی یوکسلدی گئن مئیدانلاردا
اولدوزلاشمامیزی قوروق سؤیله دی
ایچیمیزله بیرگه، قالدیریملاردا
قونوشماغیمیزی یاساق ائیله دی
زامان یابانجی تک، بیز غریبسه میش
فیرلاندیق باشینا یالقیز تبریزین
کؤلگه لر اینسانا چئوریلن چاغدا
قیردیق کؤلگه سینی بیر بیریمیزین
:İki türkcə Şiir
1
Duyğularımdan dışarıya pırtlayan tabloda
.Sən baxırsan
Zaman qısalır
1
Yağış ağacını
Şallaqladı ıldırım
Yarpaqları
Damla damla
Dagıldı.
2
Bağışladım qanlımı
Sonra onun yerinә dara çәkildim
Ölümü gözlәdiyim yolları
Satdılar.
Aydın yarın
ساچلارینین ایزی اللریمده دیر
بیر شهرجه اولدوز قونوب اللریمه
سحر
سر ساچلارینی
ایتگین شهریمین اوستونه
ـ یاتسین گئجه یه دک
حؤوشنه سیز ـ اینجیک سیزـ
اللریمده شهرلرین چیراقلاری یانیر
چوخو آج اؤلدو
یوخسول بیر عایله ده دونیایا گلدیم
ـ ساعاتلار آجلیغی پایلاردیلار
و آتام چالیشاردی... ـ
ایلک گؤروشده سئودیيیمه
آجلیغی سوندوم
اونو گؤرنده سه
الیمده كي قورو چؤره یی گیزلتمه دیم
ـ من قورشون بالاسییدیم ـ
یوردومدا
چوخو آج اؤلدو...
تورکجه شعر
آتامی قایغی لاریندان آسدیلار
امک لری یارپاق ـ یارپاق
ـ اعدامین پاییزینداـ
آیاقلارینین آلتیندا
یاس توتدولار
آتامی آسدیلار
و حیات سئوگی سین
اعتراف کاغاذینا یازدیلار
او آسیلان گون
گونش گؤیون گرایلی گؤزلرینی
کوچه لرده بیچدی
قارانلیق و شهرسیز گئجه
بو قارانلیق و شهرسیز گئجه نين
یوخلادیغی اولدوزلار
دوغاجاقدیر نئچه یوزمین سحرین
...
یوخودان دیسکینیب، تله سیک بئله
بهمن کیمی داغدان آغناییردی چن
توز کیمی بورویوب، داغین باشینی
سانکی یئر ایچیندن قایناییردی چن
اتکده یاخیلیب خیاوانلارا
ائولری بیر به بیر قوجاقلاییردی
شهرین یوخوسون ایلکین سحرده
شئهلی آددیملارلا، آیاقلاییردی
بیزی قوورالاییب اریدن شهر
چنین پاک لیغیندا، قوورالانیردی
کوچه لری بیر ـ بیر یوخودان قالخیب
گؤزه للیک سئحرینی دئمک آنیردی .
آیدین یارین
...
آتلارا آتلانیب
یئل کیمی اسدیک
بو باشدان ـ او باشا
ـ اوفوقه سایریشان ـ
دنیزده ن کئچدیک.
لپه لری دیسکیندیردی دیله ییمیز
دجل ـ دجل دنیز قیزلاری
قاپیب قاچیرتدیلار
اؤپوش لریمیزی.
*
ساحیله چاتاندا
یاتدیلار آتلار
ساحیل گئجه سینده
ـ قوملارین قوینونداـ
یاتدی آتلایلار:
... ماوی دریلی بیر قیز
آددیملارین باسا ـ باسا
قوملو یاتاغیمیزا
گلدیییمیز یولو باخیشلاییردی
دؤشلرینده ن
قانلی بیر سود آخیردی
آیدین یارین
سون گؤروشوموزده
یاغیش یاغیردی
و قارمان اؤپوش لریمیزی یولا سالیردی
او توی آخشامیندا
قاوال ـ قاوال
دؤیونوردو اوره ییم
الیمدن الین سویوق اوزولنده
و باشقا بیر گؤروشو گؤزلرین
گؤزلریمه بورجلو قالاندا
***
یاغیش یاغیردی
سون گؤروشوموزده
منده گیزلدیردیم گؤزیاشلاریمی
یاغیشلا
هاوایا قاریشیردی توستولو اؤپوش
نفس لرینین ایزینی اؤپنده
و آددیملارینین آردیجا
سورونوردو آرزیلاریم
آیدین یارین
