ماحمود درويش ده کؤچدو

شاعير دوستلاريم

بيز يئني بير دونياداييق

شعرلريميز

           بوياسيز، دادسيز و سس سيز اولاجاقلار

چيراقلاري

ائولرده دولانديرماسالار...

ماحمود درويش 1942 ـ نجي ايلده فلسطينين « بروه » کندينده دونيايا گؤز آچدي.

او ايسه 1948ـ نجي ايلين تارتيشمالاريندا آلتي ياشي اولارکن، عايله سيله « حئيفايا» کؤچدو. او بوشهره چاتديقدا آناسيني الدن وئردي و آناسينين ياسي، وطنينين دردي ايله بير ـ بيرينه قاريشدي.

حئيفا فلسطينين کولتورال باشکندي اولاراق، ماحمودو اؤز باغريندا بسله دي. او بو شهرده عرب مسلمان اوشاقلاري و يهودو اوشاقلارين آراسيندا اولان تبعيضي ايچدن آنلادي. مدرسه ده ديواري گونده ليکده وطنينين دوشمانلاريني « صفت سيز ييرتيجي» آدلانديريب، مدرسه دن ائشييه ساليندي.

16 ياشيندا بير کافه ده ايشله ميه باشلادي.

اوشاقليقدا چکدييي دردلر اونو اولو بير شاعيره چئويردي.

درويش يازيلارينين بيرينده يازير:

« انگليليسلر آتامي ايشکنجه وئرن کاکتوس لار، ايندي بؤيوک بير آغاج اولوبدورلار. ياديمدادير کي کندين دوکتورو نئچه يوز کاکتوس تيکانيني آتامين دريلريندن چيخارتدي. آنجاق اتينده ايتن تيکانلار تاپيلماديلار. آتا! کيمسه نين گله جه يي بيزدن ياخشي اولدو؟ تيکانلارين آجيشماسينا دؤزوب و تورپاغيندا قالانلار، يوخسا اؤلکه سينه قاييديب و تيکانلاردا بير شئي لر تاپمايانلار؟»

ماحمود درويشين ايلک شعر دفتري 18 ياشيندا « زيتون آغاجلاري» آديلا ياييلدي. بو کيتاب، اسرائيلين کمونيست حزبينين «تعاوني بيرلييي» طرفيندن باسيلدي و بو تعاونينين باسماخاناسينين ييغيشديريلماسينا و کيتابين توقيفينه سبب اولدو. آنجاق نئچه اون مين ساييسيندا، مصر و باشقا عرب اؤلکه لرينده ياييلدي.

درويش 1963 ده دوستاق اولدو. بو دوستاغين نتيجه سي « فلسطيندن بير عاشيق» شعر توپلومو، «امين عبدالقادر» الي ايله قاهره، بيروت و دمشق ده ايشيق اوزو گؤردو و يوزمين سايي ايلک هفته سينده ساتيلدي.

نزار قباني عرب شاعيري درويشه گؤره دئييب: « درويش ذاتي گوجوايله اسطوره لرين دوواريني سؤکوب و فلسطينين انقلابيني ايران کؤرفزيندن  آتلانتيک اقيانوسونا دک بوتون ائولره آپاردي.»

درويش اييرمي دن آرتيق کيتاب ياييدي. اونلاردان : «گئجه نين سونو»، « سئوگيليم يوخودان دورور» ، « نييه آتي يالقيز قويدون» و « محاصره » يه اشاره ائتمک اولور.

ماحمود دانيشيقلارينين بيرينده دئييب: « من شعرده آراديغيم آماج بودور کي فلسطيني بوتون ضعف لريله، و دلي قانليليغي ايله تصويره چکم... فلسطين يالنيز دووارداکي بير شعار دئييل...»

دوغروداندا اونون شعري وطنينده و باشقا اؤلکه لرده غريبسه ميش بير اينسانين اولو و جانلي تابلوسودور.

درويشين فلسطيني، بوتون يئر کوره سيدير. بير کوره کي اوندا اينسانلارين حياتي، ساييسی آز اولان بير جاناوارين اويونجاغيدير.

« رشاد ابو شاور» دئيير: « خياواندا بير کيشيني گؤرسه نيز  کي يول گئده ـ گئده اؤزويله دانيشير، ايکي حالت اولا بيلير. بو يا ده ليدير يادا بير فلسطينلي.»

و ائله بو ده لي کيشي اسرائيلين بومب سالان اوچاغانلاريني « آغ قومرو» گؤرور:

اوچاغانلار گؤزدن ايتـنده،

آغلار

آغ قومرولار

قانادلانيرلار

و جنتين اوزونو يويورلار

سونسوز قانادلاري ايله

ايشيغين  و روحون وارليغيني اوغورلاييرلار

يوخاري

لاپ يوخاري

آغلار

آغ قومرولار

يوخاري، لاپ يوخاري اوچورلار

آه

يالنيز گؤيون گئرچکليي اولسايدي

(بؤيله سؤيله دي منله بومب لارين اورتاسيندا آدديملايان کيشي)